IDENTIDAD NACIONAL TA E BASE PA FORMA UN MIHOR EDUCACION
Esaki ta forma parti di maneho strategico di un pais
ORANJESTAD– Michella Laclé e/v Steenvoorde candidato number 27 riba lista di MEP ta conta cu Movimineto Electoral di Pueblo semper a trata sistematicamente pa eleva calidad di educacion na Aruba y a sinta den diferente proyectonan pa analisa y diversifica e sistema di educacion y ta di opinion cu educacion ta forma parti di e maneho strategico nacional di un pais.
Pesey mes lo percura pa cambio, adaptacion y creacion di diferente ley di enseñansa tuma lugar pa garantisa implemenatcion di PEN 2030 den consulta constante cu docentanan. Manera nos tur sa, PEN ta para pa Plan di Enseñansa Nacional y e ta un lista di enfoke y metanan cu entre otro Departamento di Enseñansa a delinea pa por cumpli cune prome cu e aña 2030.
Riba 20 di november di aña 1989 Nacionan Uni a stipula e tratadonan internacional di derechonan di mucha, 54 articulonan di ley di proteccion di mucha, casi tur pais na mundo a ratifica e tratado aki. Aruba a ratifica e tratadonan aki na 2001.
Articulo 30 di derechonan internacional di mucha, ta papia di e derecho di un mucha pa haña enseñansa den su mesun idioma y cultura, muy en especialmente si e idioma ta uno cu no ta wordo papia na hopi lugarnan di mundo. Pa kiko esaki ta importante? Paso un mucha ta compronde conceptonan nobo mas mihor den su mesun idioma. Den pasado nos enseñansa tawata concentra hopi riba reproduci informacion (siña foi cabes), nos kier concentra riba desaroya e abilidad di pensamento critico (compronde conceptonan dificil). Esaki no lo bai impidi nos muchanan den futuro pa bai studia afo. Apesar di todo tin hopi Japones ta bai studia na TU DELFT y nan nunca a haña enseñansa den Hulandes na nan scol basico!
Na momento cu nos tuma educacion y combina esaki cu idioma y cultura di loke ta biba den nos propio pais di maneranan innovativo, Aruba ta den un bon caminda pa desaroya otro areanan y niche turistico na nivel internacional. A pesar di todo un turista kier wak nos cultura y identidad ora e pisa nos suela, pues nos mester cuide.
Creatividad, innovacion pa stimula entre otro Identidad Nacional, cultura, historia, den educacion primario y secundario ta e prioridad di e Plan di Enseñansa 2021/2024.
Den e area cultural, e identidad Arubiano ta importante, cu un perspectiva di diferente angulo di enfoke. E rol di educacion den e mantenemento y e desaroyo di e cultura Arubiano ta hopi importante.
Movimiento Electoral di Pueblo MEP, lo sigui tur e puntonan di interes cu a wordo treci tambe dilanti durante PEN 2030, entre otro e tematica di Identidad Nacional cu ta forma e fundeshi di un pais.
Papiamento, innovacion, cultura y e sentimento di nacionalismo, amor pa bo baranca, incorporando material educativo, manera video, ilustracion, digital lo crea e cuidadano cu un sentimento di honor pa su pais y su idioma, usando tecnologia den un forma responsable den un comunidad moderno y digitaliza.
E maneho strategico na nivel nacional, siguiendo di serca tur desaroyonan internacional, manera avanse den tecnologia y innovacion, labor y economia, basando su mes riba Identidad Nacional, ta loke ta primordialmente forma e punto di salida pa e programma di Educacion pa e proximo 4 aña.
Identidad Nacional, usando nos idioma Papiamento como e catalysator, cu ta fungi como e unidad di unifica e sentimento di orguyo pa cu nos idioma, pero alavez siguiendo e diferente sondeonan na nivel internacional, na unda cifranan ta keda enfatisa cu e dunamento di les den nos propio idioma den e prome anjanan di e mucha su estudio ta duna frutonan inprecindible.
Un plan di educacion cu ta inclui commission pa SDG y commission di derecho humano y di derecho di mucha,lo ta basa riba maneho di idioma, cultura y Identidad Nacional.
Na unda lo explora e mihor manera pa crea un instituto di maneho y implementacion di idioma cu lo ta e autoridad den maneho nacional di idioma na Aruba.
E introduccion di e garantia di maneho multilingual, na unda Papiamento ta e idioma di instruccion ( den enseñansa primario, hunto cu e idiomanan Hulandes, Spaño y Ingles, lo ta e punto strategico pa traha riba e Identidad Nacional, y alavez garantiza un mihor inisio di e mucha su educacion.
E desaroyo aki sigur mester bay man den man y ricibi e sosten di innovacion, loke Movimiento Electroral di Pueblo a bin ta sostene den su maneho durante e ultimo 4 añanan.
Identidad Nacional ta garantiza, cu Bo sosten. y asina Aruba ta avansa. Pa sa mas di Michella su planan por bai riba e website www.michella.org
